جزيرة فيلكا

تعتبر إحدى جزر الكويت العشر، ألا و هم:

جزيرة بوبيان (الأكبر)

جزيرة فيلكا (فيلچا)

جزيرة كبر

جزيرة وربة

جزيرة عوهة

جزيرة قاروه

جزيرة مسكان

جزيرة الشويخ

جزيرة أم المرادم

جزيرة أم النمل (الأصغر)

تقع جزيرة فيلچا شرق الكويت و تبلغ مساحتها ٤٣ كم مربع بطول ١٢ كم و عرض ٦ كم

يعني تعادل مساحتها نص محافظة حولي!

تعتبر الجزيرة الوحيدة اللي كانت مأهولة بالسكان قبل الغزو

و الحين فيها بعض البيوت اللي رمموها و أو أعادوا بنائها أصحابها

بعيداً عن كل آثار الغزو المؤسفة، بكلمكم عن زيارتي المصورة لجزيرة فيلچا:

بدأت رحلتي بطراد الوالد من الساعة 11 الصبح

المشوار أخذ نص ساعة و الجو كان ضباب

طبعا يشترط وجود سيارة داخل الجزيرة لأن التمشي فيها صعب

في عبارات تنقل الزوار مع سياييرهم مثل عبارة بنت الخير

أول شي مر علينا متحف فيلكا

فيه آثار رومانية قديمة بعضها واضح للعيان و البعض الآخر للحين علماء الآثار ما كملوا حفر

حاشنا موقف مضحك للأسف، لما وصلنا عند بوابة المتحف (طبعا لما أقول لكم متحف لا تتخيلون متحف صجي، بر و شوية آثار) كلمنا الحارس قلنا له نبي ندخل، قال لنا: ممنوع لازم كرت زيارة من المجلس الوطني للثقافة و الفنون و الآداب!!!

بصراحة ضحكني، على شنو كرت زيارة؟؟ ياي أشوف المعالم و أمشي! عالعموم دخلنا و كان الحارس معانا طول الوقت

هذي أحد الآثار

توجهت بعدين حق القرية التراثية و إهي المكان الوحيد اللي يستحق الزيارة بالجزيرة

هذا مخطط للقرية و شنو موجود فيها باختصار

القرية مخصصة للي مأجرين بفندق إيكاروس الخاص بالقرية (بس عادي دشينا)

هذا جدول لأسعار الغرف

ما قدرت أروح أشوف الغرف لأن الوقت ما كفى

الحين بتشوفون صور عامة للقرية

هذي أحد الممرات

هذا ملعب الغولف

تأجير الجمل أ, البوني (لفة كاملة بدينار)

في كفتيريا أو مطعم صغير بالقرية بس ما رحت صوبه (للعلم في 4 بقالات بالجزيرة و ما في جمعية)

هذي حديقة فيها ألعاب

متحف الشيخ عبدالله السالم

متحف رائع  للتاريخ الكويتي القديم و هو على شكل بيت عربي قديم و كل غرفة فيها نوع معين من القطع الأثرية النادرة

أغلب الغرف فيها مجسمات بالحجم الطبيعي ، و أشكالهم يخرعون إذا الواحد بطل الباب و دش فجأة

وايد ممتاز المتحف بمحتوياته لكن عندي عتب بسيط إن كل القطع الأثرية ما عليها حماية ، بمعنى إن ممكن للصغار أو أي أحد إن يعبث بهذي المقتنيات الثمينة

صورة جميلة داخل المتحف لحكامنا و نبذة عن حياة كل أمير و مدة حكمه

و هذا المسجد اسمه على اسم الجزيرة موجود داخل القرية (لله الحمد في 4 مساجد تقريبا في الجزيرة)

رحلتي كانت قصيرة لأن الشمس تغرب الساعة 5 و لازم نرجع الديرة قبل الغروب

أتمنى إني عرفتكم على شي بسيط من تاريخ هذي الجزيرة الممتد تاريخا لآلاف السنين و اللي للأسف قل الاهتمام فيها من بعد الغزو